mércores, 13 de marzo de 2024

EXPOSICIÓN: ELAS E AS SÚAS VOCES








A nosa alumna Antía Castro Suárez de 1º de Bacharelato C contribuíu a esta exposición con esta obra :


"Se cadra, Medusa, a única Gorgona mortal, poida levarnos ao interior dos holobiomas de Terrápolis e aumentar as nosas posibilidades de esnafrar as naves dos Heroes do século XXI contra un arrecife de coral vivo, no canto de permitirlles chuchar a última gota de fósil das rochas mortas"


Donna Haraway

(Filósofa feminista)

 

Achégate para veres tamén algúns dos numerosos traballiños feitos por alumnado do centro para a materia de Inglés. 

Aquí tes só un pequeno adianto:







venres, 8 de marzo de 2024

8 DE MARZO:  ELAS E AS SÚAS VOCES

AS DAMAS QUE ANTANO CANTARON

Cantar o cantar das damas que foron, coas neves de 

antano e a soga ao pescozo. Suicidas por sobreviver.

Santas de levitar. Loucas de corazón. Coas palabras 

torcidas cantar como a água nas estalactitas do olvido.

 

Surxiron das telas, das doces telas perfumadas en que 

envolver os sentidos. No pensamento os paxaros 

asubiaban boleros. Eran nais e criadas coas mans

vermellas de esfregar e non bandeiras. Palabras de 

conformidade tiveron, señoras da navegación

subterránea.

 

Tamén tiñan corpo. Ese corpo burdel cos veludos

vermellos cambiados por fitas verdes de seda, meu 

señor. E si, si, si, palabra penélope da espera.

 

E alma para comprender sen precisar de ensinanza, 

siléncio, riso e alimento torrencial para amamantar

greis enteiras.

 

Asi foron feitas, carne de multiplicar e de verbo. Por iso

agora aqui quero

 

Cantar o cantar dos cantares, de Safo-alceu a

safiduría, con Afrodita nos mares incitando-te para que

te despeñes, e Helena para que saibas como morre o

Cazador por ti e por amor da morte.

 

O cantar de Exéria á ida e o de Prócula á volta, cos teus 

andares camiños entre as baladas do tempo.

 

De Hildegarda o latín que aprendeche en segredo, nos

conventos da noite, para acabar, case antonte, na 

interxección dun disparo.

 

De Murasaki Shikibu as colunas de signos que 

sosteñen Xapón e o teu escreber desde o fundo dos

mares.

 

De Rosa, Marie, Rosalía, Florbela, Dolores, Virxinia,

Simone e porque nunca seus nomes esqueza ninguén

de cantar Frida Khalo.

 

                                                LUÍSA VILLALTA (Letras galegas 2024)


VENAS VER,  LER,  SENTIR, COMPARTIR NA NOSA BIBLIOTECA

UNHA EXPOSICIÓN ACHEGARATE A ELAS E A MOITAS OUTRAS

venres, 1 de marzo de 2024

ALGUNHAS DAS NOSAS NOVIDADES DE MARZO


    Achégase o 8 de marzo, Día Internacional da Muller. Esta data sérvenos para convidarte a vir pola Biblioteca e ver novas adquisicións que formarán parte dunha exposición que inauguraremos a próxima semana. Presentámosche aquí algunhas das novidades, mais teremos moitas outras. 







ANÍMATE A VER ESTAS OBRAS!




xoves, 29 de febreiro de 2024

AS NOSAS NOVIDADES AGÁRDANTE

 


                              Destacamos entre elas de maneira especial:

               

Cinza de Manel Cráneo é a adaptación ao cómic da novela A nosa cinza de Xavier Alcalá, que tamén podes coller na nosa biblio. 

 

mércores, 28 de febreiro de 2024

Xaneiro e febreiro foron meses de compartirmos lecturas na nosa Biblioteca


            Este foron os libros lidos e comentados nos nosos diversos clubs

                         

                                         
         




Podes velo no noso instagram

Agardámoste en marzo con outras novidades

Anímate!! 

luns, 4 de decembro de 2023

XVIII CERTAME DE MICRORRELATO 

IES FERNANDO BLANCO


EDICIÓN ESPECIAL DE MICRORRELATOS DE TERROR


ALUMNADO PREMIADO:

Categoría B- Alumnos/as de 4º da ESO, Bacharelato e Ciclos Formativos.


1º PREMIO:

Ángela Rey Figueira de 1º CM de Xestión Administrativa.


2º PREMIO :

Mateo Alves Estévez de 1º de Bacharelato.

RELATOS PREMIADOS (Preme no enlace para lelos)

 

A Categoría A  (Alumnos/as de 1º, 2º e 3º da ESO, F.P. Básica e ESA ) quedou deserta.


OS PREMIOS SERÁN ENTREGADOS O XOVES 21 DE DECEMBRO NO FESTILINGUA de NADAL QUE SE CELEBRARÁ NO SALÓN DE ACTOS DO CENTRO.

ORGANIZACIÓN: EDLG, EQUIPO DA BIBLIOTECA E CLUB DE LECTURA



venres, 24 de novembro de 2023

Por fin hoxe,  os integrantes do Club de lectura Nautilus tivemos o agardado encontro con Serena Simón Vives coa que comentamos os relatos de Delirios y desvelos, obra constituída por tres historias de medo e terror que deron para a reflexión e para formularlle curiosidades á súa autora, quen se achegou tamén ao proceso da creación literaria. Isto xerou, ademais,  momentos de compartir experiencias con algúns dos tripulantes de Nautilus que, non só len, senón que tamén deron xa os seus primeiros pasos neste mundo da escrita. 

 



 

Desde a distancia, os 1107 quilómetros que separan Cee de Cox (Alicante) como ben nolo fixo saber Serena, queremos agradecerlle a súa atención para connosco e, sobre todo, que puideramos desfrutar dun tempo de xuntanza ao redor das súas historias, mais tamén do fenómeno literario en xeral.  

 

 





          

 

 

 

mércores, 22 de novembro de 2023


venres, 3 de novembro de 2023

RECORDA!! A NOSA PRIMEIRA LECTURA COMPARTIDA 





O vindeiro mércores 8 de novembro os tripulantes de Nautilus reuniranse para comentar "Os crimes da rúa Morgue", publicado en 1841 polo escritor norteamericano Edgar Allan Poe.

Poe está considerado como o creador do relato curto contemporáneo, ademais de ser tamén pioneiro na temática de contos de misterio e terror.

Conseguirá o detective Auguste Dupin resolver o misterioso caso das mortes de Madame L'Espanaye e a súa filla Mademoiselle Camille L'Espanaye? Será máis astuto que a policía? Seremos capaces de averiguar quen é o asasino antes do final? 🕵️‍♂️


              A NOSA EXPOSICIÓN TEMÁTICA PARA ESTES TEMPOS 


                     "O medo, o terror e o suspense na literatura"
 




                    

martes, 31 de outubro de 2023

SAMAÍN

                              Hoxe 31 de outubro

Un ano máis,  na Biblioteca,  entraremos nos territorios da escuridade e do descoñecido 




Aproveitando a atmosfera que se crea na Biblioteca, nos próximos días, continuaremos con actividades relacionadas co MEDO E O TERROR :

- Reunión club de lectura (8 de novembro): comentaremos "Os crimes da rúa Morgue", Edgar Allan Poe
- Exposicións libros relacionados coa temática sinalada
- Proxección de películas en sintonía con este "asunto terrorífico"
         - O que vaia xurdindo 

VEN PASAR MEDO CONNOSCO! 😱

 


martes, 24 de outubro de 2023

DÍA DAS BIBLIOTECAS




Agardámoste hoxe e sempre! Vennos ver! 




Reivindiquemos esta nosa biblioteca como unha xanela aberta á lectura, espazo onde aprender, lugar para descubrir, para encontrarse e convivir.  Tezamos espazos de encontro nos que compartir experiencias e recursos.