Microrrelatos 2013

Un ano máis, o Equipo de Normalización Lingüística, en colaboración co Club de Lectura Nautilus e a Biblioteca do centro, organizaron o concurso anual de microrrelatos. Nesta ocasión, as gañadoras foron Margot Campetella (4º da ESO) e Brixit Caamaño (2º de Bacharelato). Velaquí os textos premiados:




"O sangue invadía o meu corpo, a dor era insoportable. Non quería que volvesen a facerme dano. Entón comprendino, tiña que facelo: por min e pola miña familia. Xamais me puiden despedir deles"
                                                                                  Margot Campetella Vilela


O vello caxato

"As lapas do lume envolvían o frío que se colaba pola fiestra. As sombras proxectadas nas paredes da cociña debuxaban maléficas criaturas nunca descubertas. O normal é que tivese medo aquí, eu soa, observando atentamente o lume da lareira apoiada no vello caxato. Pero non, pasaron demasiados anos e  pasei por demasiadas cousas para ter medo agora. Xa nada me asusta. Tal vez as penas e os grandes sacrificios me deron forza para seguir adiante ou simplememente me acostumei a isto.
Só me queda esperar a que acabe todo... observando o lume, sentada fronte a el, apoiada no vello caxato."
                                                                                                Brixit Caamaño Lago